އައިސް ޕްލާންޓްތައް ހިންގުމުގެ ލައިސަންސް ދިނުމާއި ގުޅޭ

މިމިނިސްޓްރީގެ ނަންބަރު: 30-B1/CUR/2024/11 (29 ސެޕްޓެމްބަރު 2024) ސަރކިއުލަރ އަށް ޙަވާލާދީ ދަންނަވަމެވެ.

ޙަވާލާދީފައިވާ ސަރކިއުލަރ ގައި ދަންނަވާފައިވާފަދައިން ޤާނޫނު ނަންބަރު: 2019/14 ދިވެހިރާއްޖޭގެ މަސްވެރިކަމުގެ ޤާނޫނުގެ ދަށުން އެކުލަވާލާފައިވާ "މަސްވެރިކަމުގެ މަޝްރޫޢުތައް ޤާއިމްކުރުމަށް ހުއްދަދިނުމުގެ ގަވާއިދު" (ނަންބަރު: 2020/R-91) ގެ ދަށުން މި މިނިސްޓްރީން ހުއްދަ ލިބިގެން ޤާއިމްކޮށްފައިވާ އައިސް ޕްލާންޓްތަކުން، އައިސް އުފައްދައި އައިސް ދޫކުރުމުގެ ޚިދުމަތް ދޭންފެށުމުގެ ކުރިން ގަވާއިދު (ނަންބަރު: R-82/2023) [މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާއިދު]ގެ ދަށުން  އައިސްޕްލާންޓް ހިންގުމުގެ ލައިސަންސް ނަންގަވަން ޖެހިވަޑައިގަންނަވާނެކަމުގައި ދަންނަވަމެވެ.

މަސްވެރިންނަށް އައިސް ފޯރުކޮށްދިނުމަށް އައިސް ޕްލާންޓް ޤާއިމްކުރުމަށް ހިންގާ މަޝްރޫޢުތަކަކީ އައިސްޕްލާންޓް ޤާއިމްކުރުމުގެ މަސައްކަތް ފެށުމުގެ ކުރިން މަސްވެރިކަމުގެ މަޝްރޫޢުތައް ޤާއިމްކުރުމަށް ހުއްދަދިނުމުގެ ގަވާއިދުގެ ދަށުން ހުއްދަ ނަގައިގެން ފަށަންޖެހޭ މަސައްކަތެއްކަމުން، މިފަދަ މަޝްރޫޢުތައް ފެށުމުގެ ކުރިން ގަވާއިދުން މި މިނިސްޓްރީން އެކަމަށް ހުއްދަ ހޯއްދަވައިގެން އެމަޝްރޫޢުތައް ކުރިއަށް ގެންދިއުމަށް ދަންނަވަމެވެ. އަދި މިގޮތުން ޤާއިމްކުރެވޭ އައިސްޕްލާންޓުން ޚިދުމަތް ދޭންފެށުމުގެ ކުރިން މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާއިދުގެ ދަށުން  [އައިސްޕްލާންޓް ހިންގުމުގެ ލައިސަންސް] ނެގުމަށްވެސް ދަންނަވަމެވެ.

މިހާރު އައިސް ޕްލާންޓްތައް ހިންގަމުންގެންދާ ފަރާތްތަކުންވެސް މިޤަވާއިދުގެ ދަށުން ލައިސަންސް ނަގަންޖެހޭގޮތަށް ކަނޑައަޅާފައިވާކަމުގައި ދަންނަވަމެވެ.

މީގެ އިތުރުން، މިހާރު އޮޕަރޭޝަނުގައި ހުރި އައިސް ޕްލާންޓްތަކުން ގަވާއިދުން ފޮނުވަންޖެހޭ މަޢުލޫމާތު އައިސްް ވިއްކާ ޢަދަދާއި އައިސް ވިއްކި އުޅަނދުފަހަރުގެ ތަފްޞީލު މަހަކު އެއްފަހަރު މި މިނިސްޓްރީން ދޭ "އައިސްޕްލާންޓްގެ ދުވަހު މަޢުލޫމާތު ފޯމް" މެދުވެރިކޮށް ފޮނުއްވަމުން ގެންދިއުމަށްވެސް ހަނދުމަފުޅުކޮށް އަރުވަމެވެ.

ވީމާ، އައިސްޕްލާންޓްތައް ހިންގަމުންގެންދާ ފަރާތްތަކުން އިސްވެދެންނެވުނު ގަވާއިދުގެ ދަށުން އައިސްޕްލާންޓް އޮޕަރޭޓްކުރުމުގެ ލައިސަންސް ނެގުމާއެކު، އައިސްޕްލާންޓްގެ ދުވަހު މަޢުލޫމާތު ރިޕޯޓް މިނިސްޓްރީއަށް ގަވާއިދުން ހުށަހަޅަމުން ގެންދިއުމަށް ދަންނަވަމެވެ.  މިކަމާއި ގުޅޭގޮތުން އިތުރު މަޢުލޫމާތު ސާފުކުރެއްވުމަށް މި މިނިސްޓްރީގެ ނަންބަރު:3339214  ނުވަތަ 3339215 ފޯނަށް ގުޅުއްވުމަށް ނުވަތަ [email protected] އަށް އީމެއިލް ކުރެއްވުމަށް ދަންނަވަމެވެ.