"ބަޔޯސެކިއުރިޓީ ފޯ އިމްޕޯޓް އެންޑް އެކްސްޕޯޓް އޮފް ޕްލާންޓް ޕްރޮޑަކްޓްސް އިންޓު ދަ މޯލްޑިވްސް" ގެ ނަމުގައި މަސައްކަތު ބައްދަލުވުމެއް ފަށައިފި

"ބަޔޯސެކިއުރިޓީ ފޯ އިމްޕޯޓް އެންޑް އެކްސްޕޯޓް އޮފް ޕްލާންޓް ޕްރޮޑަކްޓްސް އިންޓު ދަ މޯލްޑިވްސް" ގެ ނަމުގައި މަސައްކަތު ބައްދަލުވުމެއް ފަށައިފިއެވެ.

މި ޕްރޮގްރާމަކީ މިނިސްޓްރީ އާއި ވޯލްޑް ބޭންކު ގުޅިގެން ކުރިއަށްގެންދާ " މޯލްޑިވްސް – ޓްރާންސްފޯމިންގ ފިޝަރީޒް ސެކްޓަރ މެނޭޖްމަންޓް އިން ދި ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް" (ޓްރާންސްފޯމް) މަޝްރޫއުގެ ދަށުން ކުރިއަށް ގެންދާ ތަމްރީން ޕްރޮގްރާމެކެވެ.

މީރުމާ ހޮޓަލް، ގައި ކުރިއަށްދާ މި ތަމްރީނު ޕްރޮގްރާމް މި މަހުގެ 25 އިން ފެށިގެން 29 ވަނަ ދުވަހުގެ ނިޔަލަށް ކުރިއަށްދާނެއެވެ.

މި މަސައްކަތު ބައްދަލުވުމުގެ މައިގަނޑު މަޤްޞަދުތަކުގެ ތެރޭގައި މުއައްސަސާތަކުގެ ޤާބިލުކަން އިތުރުކުރުމާއި، ބޯޑަރު ބަލަހައްޓާ ފަރާތްތަކާއި ރެގިއުލޭޓަރީ އިދާރާތަކުގެ މެދުގައި އޮންނަ ގުޅުން ހަރުދަނާކުރުމުގެ އިތުރުން، ބޯޑަރު ހުރަސްކޮށް ކުރެވޭ ދަތުރުފަތުރުތަކާއި މުދާ އުފުލުން ކޮންޓްރޯލްކުރުން ހަރުދަނާކުރުން ހިމެނެއެވެ. މީގެއިތުރުން، ސަރަހައްދީ އަދި ބައިނަލްއަޤުވާމީ މިންގަނޑުތަކާއި އެންމެ ރަނގަޅު އުސޫލުތަކާ އެއްގޮތަށް ބޯޑަރު ކޮންޓްރޯލްކުރުމާއި، ކުރިމަތިވެދާނެ ނުރައްކާތައް ކުޑަކުރުމަށް އެޅިދާނެ ފިޔަވަޅުތަކާ ގުޅޭގޮތުން މި ތަމްރީނުގައި ފުޅާދާއިރާއެއްގައި އަލިއަޅުވާލާނެއެވެ.

މި ޕްރޮގްރާމް ކުރިއަށް ގެންދިއުމަށް ރޭވިފައިވަނީ ދެ ބަޔަކަށް ބަހާލައިގެންނެވެ. އެގޮތުން، ފުރަތަމަ ދުވަސް ޚާއްޞަކޮށްފައިވަނީ ކަމާގުޅުންހުރި ހުރިހާ މުއައްސަސާތަކަށް އަމާޒުކޮށް ބާއްވާ މަލްޓިސްޓޭކްހޯލްޑަރ ވޯކްޝޮޕް އޮން ބަޔޯ ސެކިއުރިޓީއާ ބެހޭ ގޮތުންނެވެ. އަދި ޕްރޮގްރާމްގެ ދެވަނަ ދުވަހުން ފެށިގެން ފަސްވަނަ ދުވަހުގެ ނިޔަލަށް ކުރިއަށްދާނީ "ޕެސްޓް ރިސްކް އެސެސްމަންޓް، ބަލިތައް ދެނެގަނެ މޮނިޓަރކުރުން، (ޑިޒީޒް ސަރވެއިލެންސް) އަދި ޞިއްޙީ ސެޓިފިކޭޝަން ދޫކުރުމުގެ ނިޒާމުތަކާ ގުޅޭ ފަންނީ ތަމްރީނުތަކެވެ.

މި މަސައްކަތު ބައްދަލުވުމުގައި ބަޔޯ-ސެކިއުރިޓީ ރެގިއުލޭޝަން، ބޯޑަރ ކޮންޓްރޯލް، ސަރވެއިލެންސް އަދި އާންމު ސިއްހަތުގެ ދާއިރާގައި ހަރަކާތްތެރިވާ އިސް ބޭފުޅުން ބައިވެރިވެވަޑައިގެންނެވިއެވެ. މި ބައްދަލުވުމުގައި މި މިނިސްޓްރީގެ އިތުރުން، މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ، މޯލްޑިވްސް ކަސްޓަމްސް ސަރވިސް، މިނިސްޓްރީ އޮފް ޓޫރިޒަމް، އެންވަޔަރަންމަންޓަލް ރެގިއުލޭޝަން އޮތޯރިޓީ (އީ.އާރް.އޭ)، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް)، މޯލްޑިވްސް ޕޯޓްސް ލިމިޓެޑް (އެމް.ޕީ.އެލް)، މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އަދި ހެލްތް ޕްރޮޓެކްޝަން އެޖެންސީ (އެޗް.ޕީ.އޭ) ގެ ފަންނީ މާހިރުން ބައިވެރިވެވަޑައިގެންނެވިއެވެ.