52 ހަފްތާ:- މަސްވެރިކަމާ ބެހޭ ކޮލެޖެއް ޤާއިމްކޮށް، އެ ކޮލެޖުގައި ހިމެނޭ ކޯސްތަކުގެ ކިޔެވުން ފެށުން

މަސްވެރި ކަމުގެ ވުޒާރާއިން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވަޢުދުތަކުގެ ތެރޭގައި ހިމެނޭ މަސްވެރިކަމާ ބެހޭ ކޮލެޖު ޤާއިމްކޮށް، މަސްވެރި ގާނޫނުން ލާޒިމު ކޮށްފައިވާ މަސައްކަތް އަވަހަށް ނިންމުމެވެ.

މަސްވެރިކަމާ ގުޅުން ހުރި ތަޢުލީމާއި ތަމްރީނު ނިޒާމީ ގޮތެއްގައި ކިޔަވައި ދޭނެ މަދަރުސާއެއް ނުވަތަ ކޮލެޖެއް މިހާތަނަށް ވުޖޫދުވެފައެއް ނެތެވެ.

މަސްވެރި ކަމާބެހޭ ކޮލެޖަކީ ދެމެހެއްޓެނިވި ގޮތަށް ނިޒާމެއްގެ ތެރެއިން ހިނގާނެ ކޮލެޖަކަށް ހެދުމަށްޓަކައި މި މަސައްކަތް ދިވެހިރާއްޖޭގެ ޤާއުމީ ޔުނިވާސިޓީއާ ގުޅިގެން އެ ޔުނިވާސީޓީގައި "މޯލްޑިވްސް ކޮލެޖު ފޯ ފިޝަރީޒް އެންޑް އޯޝަން ސައިންސަސް" ގެ ނަމުގައި މިހާރު ވަނީ އުފައްދައިފައެވެ.

މޯލްޑިވްސް ނެޝަނަލް ޔުނިވާސިޓީގެ ދަށުން މަސްވެރިކަމާބެހޭ ކޮލެޖް ހިންގުމުގެ މަޝްވަރާ ފަށާފައިވަނީ 29 ނޮވެމްބަރު 2023 ވަނަ ދުވަހުގައެވެ. އަދި ކޮލެޖް ގާއިމް ކުރުމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާ އާއި ދިވެހިރާއްޖޭގެ ޤައުމީ ޔުނިވާސިޓީ އާ ދެމެދު ފަހުމުނާމާގައި ސޮއިކުރެވިގެން ދިޔައީ 27 ޑިސެމްބަރު 2023 ވަނަ ދުވަހުއެވެ. މި ފަހުމުނާމާގައި ވުޒާރާގެ ފަރާތުން ސޮއިކުރައްވާފައިވަނީ ވަޒީރު އަޙްމަދު ޝިޔާމްއެވެ. ދިވެހިރާއްޖޭގެ ޤާއުމީ ޔުނިވާސިޓީގެ ފަރާތުން ސޮއި ކުރެއްވީ ވައިސް ޗާންސެލަރ ޑރ. ޝެހެނާޒް އާދަމްއެވެ.

1 ސެޕްޓެމްބަރު 2024ގައި މޯލްޑިވްސް ކޮލެޖު ފޯ ފިޝަރީޒް އެންޑް އޯޝަން ސައިންސަސް ޤާއިމްކޮށް  މަސްވެރި ސިނާއަތާ ގުޅުންހުރި ކޯސްތައް ހިންގުމަށްވަނީ ފަށާފައެވެ. އޭގެ ތެރޭގައި ބެޗެލަރ އޮފް މެރިން ސައިންސް ކޯސް ހިމެނެއެވެ. މީގެ އިތުރުން  

މަސް ޕްރޮސެސްކުރުމާއި މަހުގެ ކޮލިޓީ ހިފެހެއްޓުމުގެ  ސެޓްފިކެޓް 3 ލެވެލް (1،2،3) އަދި ސްޕޯޓްސް ފިޝިންގ ގައިޑިންގ - ސެޓްފިކެޓް 3  ދަސްކޮށްދޭ ކޯސްތައްް ހުޅުވާފައި ވެއެވެ.