މިނިސްޓަރ "ފުޑް އެންޑް ބެވަރޭޖް ޝޯ 2026" ރަސްމީކޮށް އިފްތިތާޙްކޮށްދެއްވައިފި

ހުޅުމާލޭ ސެންޓްރަލް ޕާކުގައި ބާއްވާ "ފުޑް އެންޑް ބެވަރޭޖް ޝޯ 2026" ގެ 9 ވަނަ އެޑިޝަން ރަސްމީކޮށް ހުޅުވުމުގެ ރަސްމިއްޔާތު، މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ޝަރަފުވެރިކޮށްދެއްވައިފިއެވެ.

މި މަހުގެ 21 އިން 24 އަށް ކުރިއަށްދާ މި މައުރަޒު ހުޅުވައިދެއްވުމަށްފަހު، ވަޒީރު ވަނީ މައުރަޒުގެ އެކި ސްޓޯލްތަކަށް ޒިޔާރަތްކުރައްވާފައެވެ. މި ޒިޔާރަތުގައި، މިއަހަރުގެ މައުރަޒުގައި ބައިވެރިވި ފަރާތްތަކުން ދައްކާލާފައިވާ ކާބޯތަކެތީގެ އައު އަދި އީޖާދީ އުފެއްދުންތައް ވަޒީރު ބައްލަވާލައްވައި، އެ ތަކެތީގެ މަޢުލޫމާތު އޮޅުންފިލުއްވިއެވެ.

"ހައިރައިޒް ޕްރައިވެޓް ލިމިޓެޑް" އިންތިޒާމުކުރާ މި ޙަރަކާތަކީ ކާބޯތަކެތީގެ ސިނާއަތުގައި މަސައްކަތްކުރާ ހޯލްސޭލް އަދި ރީޓެއިލް ވިޔަފާރިވެރިންނާއި ކަސްޓަމަރުން އެއް ފުރާޅެއްގެ ދަށުން ބައްދަލުކުރުވައި، ކަލިނަރީ ދާއިރާގެ އެންމެ ފަހުގެ އުފެއްދުންތައް ތަޢާރަފުކޮށް ދައްކާލުމެވެ.  މި ޙަރަކާތުގެ ސަބަބުން މި ސިނާއަތުގައި މަސައްކަތްކުރާ ފަންނުވެރިންނަށް އެއް ޕްލެޓްފޯމެއްގައި ބައްދަލުވެ، ވިޔަފާރީގެ ގުޅުންތައް ބަދަހިކުރުމާއި، އާ ވިޔަފާރީގެ ފުރުޞަތުތައް ހޯދުމަށް ފަހި ފުރުޞަތެއް ލިބިގެންދާނެއެވެ.

މިސިނާއަތް އިތުރަށް ފުޅާކޮށް، ވިޔަފާރިތަކަށް އައު ފުރުޞަތުތައް ފަހިކޮށްދިނުމަށް "ހައިރައިޒް ޕްރައިވެޓް ލިމިޓެޑް" ކުންފުނިން އިން އިންތިޒާމުކޮށްގެން ކުރިއަށް ގެންދާ މަސައްކަތްތައް ފާހަގަކޮށް، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވަނީ އެ ފަރާތަށް މަރުޙަބާ ދަންނަވާފައެވެ. މީގެއިތުރުން ޙަރަކާތް  ރާއްޖޭގެ ކާބޯތަކެތީގެ ބާޒާރުގައި ހުރި ފުރުޞަތުތަކާއި ދިވެހި އުފެއްދުންތައް އިޝްތިހާރުކުރުމަށް ލިބޭ މުހިންމު ބާރެއްގެ ގޮތުގައި އެ ވުޒާރާއިން ސިފަކުރެއްވިއެވެ.