މ. މުލަކުގައި 500 ޓަނުގެ ކޯލްޑް ސްޓޯރޭޖް އެޅުމުގެ އެއްބަސްވުމުގައި ސޮއިކޮށްފި

މަސްވެރިންނަށް އައިސް ލިބުމުގައި ހުރި ދަތިތައް ޙައްލުކުރުމަށްޓަކައި، މިނިސްޓްރީން ކުރިއަށްގެންދާ މަޝްރޫޢުގެ ދަށުން،  މ. މުލަކުގައި 500 ޓަނުގެ ކޯލްޑް ސްޓޯރޭޖް ފެސިލިޓީއެއް ޤާއިމްކުރުމަށް މިއަދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކުރީ މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއާއި ސައުދީ އަރަބިއްޔާގެ އާރް.އޯ.އެސް ފޯރ ޓްރޭޑިންގް ކޮމްޕެނީއާ ދެމެދުގައެވެ.

މިނިސްޓްރީގައި  މިއަދު ބޭއްވި ރަސްމިއްޔާރުގައި،  ވުޒާރާގެ ފަރާތުން ސޮއިކުރެއްވީ، ޑިރެކްޓަރ - ފައިނޭޝިލް ކޮންޓްރޯލަރ،  އީނާސް ނަސީރުއެވެ. އަދި އާރް.އޯ.އެސް ފޯރ ޓްރޭޑިންގް ކުންފުނީގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ ޑައިރެކްޓަރ ހަމަދު މުޙައްމަދު އަލްމިން ހާލީއެވެ.

މި މަޝްރޫޢުގެ ދަށުން މ. މުލަކުގައި ޤާއިމު ކުރެވޭ 500 ޓަނުގެ ކޯލްޑް ސްޓޯރޭޖްގައި، ދުވާލަކު 50 ޓަނު މަސް "ބްރައިން ފްރީޒް" ކުރުމުގެ  ކެޕޭސިޓީ ޤާއިވެގެންދާނެއެވެ. މި އެއްބަސްވުމުގެ ދަށުން، ސްޓޯރޭޖްގެ ޑިޒައިނިންގ މަސައްކަތާއެކު މި ފެސިލިޓީ ޤާއިމް ކޮށް ނިންމުމަށް 300 ދުވަހުގެ މުއްދަތެއް ވަނީ ކަނޑައެޅިފައެވެ. މުޅި މަޝްރޫޢަށް ޖްމުލަ  5.188 މިލިއަން އެމެރިކާ ޑޮލަރު ޚަރަދުވާނެއެވެ.

މި ފެސިލިޓީ ޤާއިމުކުރުމުން މުލަކު އަތޮޅުގެ މަސްވެރިންނަށް އައިސް ލިބުމުގައި ދިމާވެފައިވާ ދަތިތަކަށް ޙައްލު ލިބި، މަސްވެރިކަމުގެ ސިނާޢަތް އިތުރަށް ފުޅާވެގެންދާނެ ކަމަށް ބެލެވެއެވެ.